VIGAN CITY – Manarimaan iti naun-uneg nga imbestigasyon dagiti otoridad iti napasamak nga aksidente idiay Barangay Poblacion West ken Gongogong, San Ildefonso idi ala una y media itattay parbangon.
Dagiti nairaman iti nasao nga aksidente ket Honda Civic a minaneho ni Matthew Palpallatoc nga agtawen ti dua pulo ket dua, naasawaan nga agnaed idiay Barangay Vacunero, Sto. Domingo kadua na iti pasahero na a ni John Mark Ribuca nga agtawen ti sangapulo ket walo a taga- Nalasin, Sto. Domingo ken Ford Ranger a minaneho ni Jacfil Autrin Palpallatoc nga agtawen ti dua pulo ket dua nga agnaed idiay San Ramon, Magsingal kadua na ti pasahero a da Gabriel Tuzon nga agtawen ti sangapulo ket pito a taga- Nalasin, Sto. Domingo.
Agpada nga agpapa-amiyanan a direksyon dagiti dua a lugan a napaspas iti taray da ta mapapati nga aglilinnumba da ket idi nakadanun da iti nakapasamakan iti aksidente, napukaw ti nagmaneho ti Honda Civic iti kontrol iti manibela ti lugan ket naidungpar iti Christmas tree iti akin-laud a shoulder iti kalsada idinto a ti Ford Ranger ket naidungpar iti concrete guard barrier iti rangtay.
Agsipud iti dayta, nagsagaba dagiti driver ken dagiti pasahero da iti dunor iti naduma-duma a paset iti bagi da.
