Sumango iti kaso nga unjust vexation ni Reymark Gabatin Canosa, agtawen iti duapulo ket walo, manngalap, ken residente ti Sitio Pideg, Brgy. Magsaysay District, Santa, Ilocos Sur kalpasan a binugkawanna dagiti biktima.
Nabigbig dagiti biktima a da John Paul De Vera Cariaga, agtawen iti duapulo ket dua, delivery boy, residente ti Brgy. Boquig, Bantay; ken Arrol Duruin Tolentino, agtawen iti sangapulo ket siyam, estudyante, residente iti Brgy. San Julian Norte, Vigan City.
Sakbay ti insidente, napan dagiti biktima iti View Deck iti Brgy. Magsaysay District tapnu gumatang ti merienda, idinto a ti suspek ken dagiti a kaduana a dua ket simmaruno, ngem ti suspek ket binugkawanna dagiti biktima nga awan rasonna ken kellaat a nagtaray a nagturong kadakuada nga adda iggemna a kutsilyo.
Timmaray met dagiti biktima iti nagduduma a direksion tapno masalaknibanda ti bagida, idinto ti suspek ket nagawid kalpasan ti insidente.
