VIGAN CITY – Innem a sachet iti mapapati a shabu iti naala manipod kadagiti dua a lalaki idiay Barangay Poblacion, Sto. Domingo iti naisayangkat kontra kadakuada a buy-bust operation.
Nabigbig dagiti suspek a da Salvador Rios nga agtawen ti lima pulo ket pito, baro ken agnaed idiay Barangay Bantaoay, San Vicente kenni Joseph Siazon nga agtawen ti uppat a pulo ket maysa, baro ken agnaed idiay Barangay Bayubay Sur, San Vicente.
Dua a heat sealed transparent plastic sachet a naglaon iti mapapati a shabu iti naala dagiti otoridad nga ikot ni Siazon, dua pay a heat sealed transparent plastic sachet a naglaon iti mapapati a shabu iti nagserbi a buy-bust item ken dua met laeng a sachet iti mapapati a shabu iti naala nga ikot ni Rios a ti mapatta-patta a gatad na ket innem a ribo a pisos.
Malaksid iti dayta, naala pay iti ikot ni Siazon ti sangaribo a pisos a buy-bust money ket iti agdama, adda pay laeng idiay Sto. Domingo PNP lock-up facility dagiti suspek.
Ni Siazon ket newly identified drug personality idinto a ni Rios ket drug surrenderee.
