PHP600,000 a gatad ti mapapati a napagango a marijuana ti nakumpiskar dagiti pannakabagi ti linteg manipud kadagiti dua a lallaki babaen iti OPLAN SITA idiay Barangay Alilem Daya, Alilem, Ilocos Sur.
Nabigbig dagiti suspek a da Lemmuel Gapo Lacson, agtawen iti duapulo ket innem, taga-Purok 2, Gahonon, Daet, Camarines Norte ken ni James Managuelod Ragasa, agtawen iti duapulo ket siam, taga-Barangay Ramos West, San Isidro, Isabela.
Iti pannaki-uman ti Bombo Radyo Vigan ken ni Police Captain Joseph Bantullay iti Alilem Municipal Police Station, nangiwayatda iti OPLAN SITA ket sinitarda ti Honda Click motorcycle ngem ti maysa a rider a ni Lacson ket pinatarayna ti motorsiklo isu a kinamat met dagiti kameng ti TMRU ket nakemmeg iti sangwanan ti Alilem Central Elementary School kangrunaan iti akin-laud a paset ti gate.
Tiniketan dagiti TMRU personnel ni Lacson ken nadlawda ti sabsabali a tignayna.
Idi masaludsod inaig iti pakabigbigan ken ti motor vehicle registration na, nakita dagiti TMRU personnel ti travelling bag ti rider a nakalukat ket nadlawda ti maysa a banag a nakabungon iti masking tape.
Binagaanda ni Lacson a lukatan ti bagna ket nakita dagiti tallo nga atiddug a banag a nabungon iti masking tape ken mapapati a marijuana a nasurok kumurang tallo a kilo ken aggatad iti PHP360K, a nakakemmeganna.
Kabayatanna, nakemmeg met iti kabambantayan a paset ti Barangay Dalawa, Alilem ni Ragasa a nakalugan iti kotse babaen iti hot pursuit operation.
Naala kenkuana ti dua nga immatiddug a nabungon iti masking tape a mapapati a marijuana nga agdagsen iti dua kilo ken aggatad iti PHP249K.
Dagiti non-drug evidence a naala ket ti motorsiklo, 44 a piraso ti genuine PHP1,000, PHP580, ATM Card, maysa a mapapati a marijuana residue a naipan iti glass jar, cartridge ti marijuana oil residue, cartridges ti marijuana residue, grinder nga adda marijuana residue na, glass tube nga adda marijuana residue na, pitaka, lighter, heater, 2 nga ID, ATM card, ken cellphone.
Datin nga adda maaw-awat a report ti Alilem Police Station maipanggep iti iligal nga aramid dagiti suspek isu a nangisayangkatda iti operasyon.
Mayur-uray met ti resulta iti drug test a dimmalanan dagiti suspek.
