Binabalaw da La Union Rep. Paolo Ortega ken ni Zambales Rep. Jay Khonghun no ayan ni Vice President Sara Duterte iti baet ti bagyo ken habagat a nangitunda iti layus idiay Metro Manila ken nadumduma a kabangibangna a probinsia.
Para kadagiti dua a kongresista, ti kaawan ni VP Sara kagiddan ti national emergency ket mangipakita iti kinaawan a panangisakit ken no ania ti kalidad ti lideratona.
Bayat nga agpakpakarigat dagiti rescuer a mangisalbar kadagiti nalayus a pamilia, kinuna dagiti dua a kongresista nga adda iti sabali a pagilian ti bise presidente gapu iti personal a rason.
Segun ken ni Ortega, saan a daytoy ti umuna a gundaway a ‘missing in action’ ni VP Sara ta idi July 2024 iti kangitingitan ti bagyo Carina, ket napanda manen a sangapamilia idiay Germany tapno agbuya iti concert ni Taylor Swift.
Innayon ni Khonghun a saan daytoy a panangpulitiko no di ket panangkita iti karakter ti maysa a lider a nasken koma nga adda ditoy pagilian no adda dagiti kailianna a madidigra.
