Karaman kadagiti priority measures ti Marcos administration ti dua a gatad ni Senator Francis “Kiko” Pangilinan a gagem a papigsaen ti suportar kadagiti mannalon ken mangngalap.
Karaman dayta ti Senate Bill 1991 wenno Agricultural and Fisheries Extension Services Act ken Senate Bill No. 1990 wenno Agricultural Cooperatives Act, nga agpada a nairaman kadagiti priority bills a nadakamat iti Legislative-Executive Development Advisory Council wenno LEDAC.
Segun ken ni Pangilinan, napateg nga agbalin a linteg nga insigida ti dua a gakat tapno maaddaan dagiti mannalon ken mangangalap ti natibker nga institutional support, access iti teknolohiya ken baro nga ammo ken naur-urnos a sistema iti kooperatiba.
Iti salinong ti SB 1991, mabukel ti natibtibker ken coordinated a national extension system tapno makaited ti technical assistance, research-based technologies, climate-smart farming practices ken agtultuloy a capacity-building kadagiti mannalon ken mangngalap.
Kabayatanna, gagem met ti Senate Bill 1990 nga yetnag ti Bureau of Agriculture Cooperatives ken papigsaen ti kabaelan dagiti agricultural cooperative a makapag-organize ken makikompetensya iti merkado.
Babaen dayta ket target a mapasayaat ti access dagiti mannalon ken mangngalap iti financing, markets, equipment ken dagiti oportunidad para iti value-adding iti produktoda.
