Nadunor iti nadumaduma a paset ti bagi dagiti dua a drayber ti motorsiklo gapu iti napasamak nga aksidente iti Barangay Pangada, Sta. Catalina, Ilocos Sur.
Nabigbig ti nagmaneho iti Black Yamaha Aerox a ni Gre John Jesus Pespes Rafanan, agtawen iti sangapulo ket walo, taga-Barangay Bongtolan, Vigan City, backrider-na ti maysa a menor de edad a babai nga agtawen iti sangapulo ket innem, taga-Barangay Cabaroan Daya, Vigan City.
Ti met Pink Mio Sporty ket minaneho ni Marichu Amian Disono, agtawen iti tallopulo ket lima, backrider-na ni Maxima Pascua Amian, agtawen iti limapulo ket siam, taga-Barangay Pantay Daya, Vigan City.
Agpapadaya dagiti dua a motorsiklo idin ta bigla a nagsikko ti Yamaha Sporty ket natukbob daytoy ti sumarsaruno a Yamaha Aerox.
Agpada a nakasuot iti helmet dagiti drayber ken naitarayda iti ospital para iti pannakatamingda.
