Dua ti natay iti aksidente iti national highway ti Barangay Jordan, Sinait, Ilocos Sur a nakairamanan dagiti dua a motorsiklo ken maysa a van.
Nabigbig ti nagmaneho iti SYM Bonus motorcycle a ni Leobert Ilar Noriel, agtawen iti duapulo ket uppat, taga-Barangay Cabulalaan, Sinait, nakasuot iti helmet.
Ti met Nissan Urvan ket minaneho ni Jerome Paez Sanchez, agtawen iti tallopulo ket pito, taga-Miyamot, Antipolo, Rizal.
Kabayatanna, ti Yamaha Sniper ket minaneho met ni Edmund Alarde Villapaz, agtawen iti tallopulo ket maysa, collector ti Nueva Segovia, taga-Bayubay Sur, San Vicente.
Agpapa-amianan ti SYM Bonus idin ta inovertakeanna ti van a dumaldalyasat met laeng iti amianan a direksyon ket nagdinnungparda ti nakasinnabetna a Yamaha Sniper.
Gapu iti impact ti aksidente, naipurwak ti drayber ti Sniper a nadungpar met ti van.
Nagsagaba dagiti dua a drayber ti motorsiklo iti dunor ti nadumaduma a paset ti bagida idinto a ti drayber ti van ket saan a naan-ano.
Naitaray iti ospital dagiti drayber ngem agpadada a naideklarar a dead on arrival.
Nakakustodian ti drayber ti van ti Sinait Police Station tapno dumalan iti husto a proseso.
