VIGAN CITY – Maysa a babai nga agtawen iti innem a pulo ket tallo a taga-Brgy. Babalasioan, Sta. Maria, Locally Stranded Individual ti maika innem a pulo ket tallo a kaso ti COVID19 iti probinsia.
Naggurigor, naguyek, nagsakit ti bagbagi ken saan a makaraman ti pasyente nga adda travel history na idiay National Capital Region ken nai-expose kadagiti lugar a narisgo iti Covid19 ngem limitado dagiti nakapulapolna.
Kabayatanna, ti maikanem a pulo ket uppat a baro a kaso ket agtawen ti duapulo ket uppat a babai a taga – Brgy. Conconing East, Sta. Lucia, maysa a locally stranded individual ken housewife a saan a naikammayet iti LGU.
Nagpanateng ken nakarikna ti sore throat ti pasyente, adda travel history-na iti National Capital Region ken nai-expose kadagiti narisgo a lugar ngem nupay kasta, limitado laeng dagiti nakapulapolna.
Gapu ti dayta, mangrugi iti September 3 agingga inton September 17 ket maidalan iti extreme enhanced community quarantine dagiti lugar dagiti pasyente a nabigbig a critical zone; modified enhanced community quarantine dagiti lugar a nabigbig a containment zone ken general community quarantine kadagiti lugar a nabigbig a buffer zone.
