Impangato ti Department of Social Welfare and Development (DSWD) ti stockpile wenno reserbada iti family food packs ken non-food relief items kadagiti warehouse iti intero a pagilian.
Segun ken ni DSWD Secretary Rex Gatchalian, iti agdama ket addaanda iti umabot lima a million a family food packs iti bodegada para kadagiti naapektaran iti Bagyo Maymay, habagat ken dadduma pay a didigra.
Kinunana a nainget nga imbilin ni President Ferdinand Marcos Jr. a kasapulan a naka-preposition dagiti relief supplies sakbay pay iti isasangbay ti bagyo, ginggined, panagbettak iti bulkan ken dadduma pay a didigra.
Agingga idi Agosto 9 ket adda naipenpen ti DSWD nga umabot iti lima a million a food packs iti umabot sangaribo a warehouses iti intero a pagilian tapno masigurado a makadanon nga insigida kadagiti umili a maapektaran.
Iti agdama ket nakairuaren ti DSWD iti nasurok 54,000 family food packs ken manamnama a ngumato pay ta maiprosproseso pay laeng dagiti request-da manipod local government units nga agkasapulan iti ayuda.
