Nakemmeg ti maysa nga Street Level Individual babaen iti naiwayat a buy-bust operation iti Boardwalk Street, Barangay I, Vigan City, Ilocos Sur.
Ti suspek ket agtawen iti duapulo ket tallo, taga-Barangay Capangpangan, Vigan City.
Iti pannaki-uman ti Bombo Radyo Vigan ken ni PLT. Amado Somera, Deputy Chief of Police ti Vigan City Police Station, dati a drug surrenderee babaen iti OPLAN ADORE ti suspek ngem sinublianna ti iligal nga aramidna.
Innayon ni Somera a kadagiti kabangibang met laeng a lugar ti pangisaysayangkatan ti suspek ti operasyonna.
Nakumpiskar manipud kenkuana iti 0.74 grams ti mapapati a shabu nga aggatad iti P5,032 a naikabil iti uppat a heat-sealed transparent plastic sachet a nagserbi kas buy-bust item ken ikot ti suspek.
Dagiti non-drug evidence a naala ket pakairamanan ti maysa a piraso ti genuine P1000 peso bill a nagserbi kas buy-bust money, maysa a bassit a piraso ti papel, cellphone, motorsiklo ken pitaka.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
