VIGAN CITY – Naballigi iti search warrant nga insayangkat ti pannakabagi ti linteg ti Narvacan Municipal Police Station kontra kenni Allan Madayag, agtawen ti tallo pulo ket siam nga agnaed idiay Brgy Margaay, Narvacan.
Segun kenni Police Capt Arcadio Viloria a mangidaulo ti Narvacan Municipal Police Station, adda iti impormasyon a naipakaammo kadakuada inaig iti panagilako ti droga ni Madayag ken adda kainaiganna iti nabuy bust idi a mangisursuro idiay San Pedro isu a nangisayangkatda iti operasyon kontra kenkuana.
Naala kenkuana ti maysa a sling bag a nangisit a naglaon ti innem a piraso iti babassit a sachet iti mapapati a shabu, maysa a homemade Cal. 38, tallo a live ammunition, maysa a medium plastic sachet iti mapapati a shabu, maysa a diaper a nakargaan iti uneg na ti dua a babassit a sachet ti mapapati a shabu, maysa a karton iti headset a puraw iti marisa na a naglaon iti nadumaduma a iti naduma-duma a drug paraphernalia ken dua a lighter, aluminum foil ken dadduma pay.
Inlawlawag ni Viloria a karaman ni Madayag iti drug watchlist ngem gapu iti nabuy bust idi napalabas a mangisursuro, nainaganan na nu siasino dagiti laklakoan ken kakadua na nga agilaklako isu a nakaala iti naan-anay a lead dagiti otoridad inaig iti kinatao ti suspek.
Ti suspek ket dati a barangay treasurer ngem naikkat agsipud iti pammabasol nga us-usaren na iti pondo iti barangay da para iti personal nga interes.
Ammo ti pamilya ni Madayag nga agar-aramat ken agilaklako iti iligal a droga ngem uray nu balakadan ken kanayon da a bagbagaan ket saan na a dengdenggen ida.
Ti agdama, addan iti ikot ti Narvacan Police Station ti suspek ket maisagsaganan iti kaso a maipila kontra kenkuana.
