Balligi ti pannakakemmeg ti drug pusher iti naiwayat a buy-bust operation iti maysa a drug cleared barangay iti ili ti Sta. Cruz, Ilocos Sur.
Iti pannaki-uman ti Bombo Radyo Vigan ken ni Police Major Paul Vinsent Tadeo iti Sta. Cruz Police Station, ti suspek nga agtawen iti duapulo ket tallo nga agnaed iti nasao a lugar ket kadua ti maysa a natiliw met laeng idi kallabes nga operasionda ken nabayag a sinipsiputanda ti iligal nga aramidna.
Nakumpiskar kenkuana ti nasurok kumurang 0.24 gram ti mapapati a shabu nga aggatad iti P1,632 a naikabil iti tallo a piraso ti heat-sealed transparent plastic sachet a nagserbi a buy-bust item ken ikotna.
Positibo iti drug test ti suspek agraman dagiti naala kenkuana nga ebidensia.
Ti met non-drug evidence ket pakairamanan ti P1,000 bill a buy-bust money.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
