VIGAN CITY – Agpapaagas iti ospital ni Sonny Ruaburo Yacap, agtawen iti limapulo ket lima, naasawaan, construction worker, agnaed idiay Barangay Sta. Monica, Magsingal a nagmaneho iti Yamaha Vega Force 150 motorcycle ta natukbobna ti sarsarunwenna a TMX tricycle a minaneho ni John Carlo Ramos Umoquit, agtawen iti sangapulo ket walo, baro, mannalon nga agnaed idiay Barangay Sarsaracat, Magsingal, Ilocos Sur.
Iti pannaki-uman ti Bombo Radyo Vigan ken ni PMaj Jojo Unciano a Chief Investigator iti Magsingal Municipal Police Station, agpada nga agpaamianan dagiti dua a lugan a ti akin-sango ket ti traysikel idinto a sumarsaruno iti motorsiklo.
Segun ken ni Unciano, apaman a nadanonda iti nasao a lugar ket nagsignal nga agpakannawan ti trysikel ken nagsikko ngem saan a napansin iti nakamotorsiklo isu a natukbobna iti tricycle a gappuanan iti pannakatumba iti nakamotorsiklo ket naitama ti ulo ti driver a saan a nakaaramat iti helmet.
Gapu iti sinagabana a dunor iti nakamotorsiklo ket naipan iti Ilocos Sur District Hospital – Magsingal ngem insigida met laeng a naiyakar iti Northside Doctors Hospital, Bantay para iti pannakatamingna idinto a saan a naan-ano ti driver ti traysikel ken maysa a pasaherona.
Kinuna ni Unciano a positibo a naka-inom ti driver ti motorsiklo idi napasamak iti aksidente isu a posible a napaspas iti panagpatarayna.
Iti pannakisaritada iti kameng ti pamilia ti driver iti motorsiklo ket aminadoda a nakapsot ti guyod ti preno iti motorsikloda isu a patienda a saan a napakadaaan ti driver iti pasamak.
Nupay kasta ket nakapagpapatangen ti pamilia dagiti karaman iti aksidente ket saanda a paggastosen ti driver ti traysikel ta aminadoda a ti nakamotorsiklo iti nakadungpar.
VIDEO – PMAJ JOJO UNCIANO
