Dead on arrival ti maysa a driver a pinaltugan ti riding-in-tandem idiay Sitio Greenhills, Barangay Elefante, Banayoyo, Ilocos Sur.
Nabigbig ti biktima a ni Marvin Ambaqued Singaben, agtawen iti uppat a pulo ket siam, taga-Barangay Poblacion.
Dagiti met suspek a dua a lalaki a nagkalubbon iti motorsiklo ket saan pay nga ammo ti pakabigbiganda.
Maibasar iti inisyal nga imbestigasyon, agayay-ayam ti biktima kadua ni Sony Cawis Gacutan iti nasao a lugar idin ta dimteng dagiti suspek a nangpaltog kenkuana.
Nagsagaba iti tama ti paltog ti nadumaduma a paset ti bagi ti biktima a naitaray iti ospital ngem saanen a nakalasat.
Naala manipud iti nakapasamakan ti pammaltog ti lima a fired cartridges ti caliber 45 ken maysa nga slug.
Dagiti suspek, nangruna ti drayber ket nakasuot iti black jacket, maong shorts, ken white ball cap, idinto a ti backrider ket nakasuot iti brown T-shirt ken shorts, ken black ball cap.
Naglugan dagitoy iti yellow a MIO125 a motorsiklo ken naglibasda a nagturong iti daya.
