Pinasingkedan ni dati a Senador Antonio “Sonny” Trillanes IV nga isuna mismo ti nagkiddaw a maikkat ti naganna iti listaan dagiti testigo nga ipasango ti House prosecution panel iti impeachment trial ni Vice President Sara Duterte.
Segun ken ni Trillanes, inaramidna daytoy tapno maksayan ti pressure a mapadpadasan ti prosecution panel, ngem ilanadnanto latta iti maysa a press conference dagiti impormasion nga idatagna koma iti trial.
Kinumpirmaran ni lead prosecutor ken Batangas Rep. Gerville Luistro iti Senate Impeachment Court a saanda nga isango ni Trillanes kas testigo para iti Article II, a mangtratar iti alegasion ti unexplained wealth ken saanna a panangideklara iti SALN-na.
Kabayatanna, inallukoy ni Senator-judge Raffy Tulfo ti prosekusion nga agbalin a nasigsiglat iti panangpili kadagiti testigo, idinto nga impaganetget ni Trillanes nga adda bank account ni Duterte ken dagiti dadduma a miembro ti pamiliana a saan a naideklara iti SALN.
