Dead on arrival iti ospital ti maysa a lalaki a nagmaneho iti motorsiklo kalpasan a naaksidente idiay Barangay Ayusan Norte, Vigan City, Ilocos Sur itay alas dose kinse iti parbangon, May 18, 2025.
Ti nagmaneho ti gray/black Yamaha Aerox motorcycle ket ni Dred Manzo Guzman, agtawen iti duapulo, Out-of-School Youth nga agnaed idiay Barangay IX, Vigan City.
Iti pannaki-uman ti Bombo Radyo Vigan ken ni PLt. Amado Somera manipod Vigan City Police Station, mapapati a naka-inom iti arak da Guzman ken dagiti kakaduana nga skater a naggapu iti terminal sakbay nga adda intulodda idiay Barangay Ayusan Norte.
Inlawlawag ni Somera nga apaman a naitulodda ti kaduada ket nagtaka laengen ti kaduana a nagmaneho iti sabali pay a motorsiklo ta saanen a sumarsaruno ni Guzman isu a nagsubli ket isun ti pannakakitana a naaksidente ken nakaiddan iti karuotan a paset iti nasao a lugar.
Mapapati a naidungpar iti barbed wire ni Guzman isu nga adda dagiti gasgas iti nadumaduma a paset ti bagina ngem posible a nagsagaba pay iti internal bleeding ta naammoan a nutshell helmet iti inaramatna idi nagmaneho iti motorsiklo.
Iti panagresponde dagiti otoridad ket adda pay laeng ti puot ni Guzman ngem apaman a naisangpeten iti ospital ket naideklararen a natay babaen ti attending physician-na.
