Nakainom ken napaspas ti patarayna ti natay a drayber ti motorsiklo gapu iti aksidente idiay Barangay Jardin, Tagudin, Ilocos Sur.
Nabigbig ti nagmaneho iti SYM 110 a motorsiklo a ni Clifford Lemi Quijano, agtawen iti uppat a pulo, awan ti driver’s license-na, taga-Barangay Las-ud, iti nasao nga ili.
Iti pannaki-uman ti Bombo Radyo Vigan ken ni Police Executive Master Sergeant Lorenzo Cariaga, bigbigat pay laeng a nakainom ti biktima ken awan ti helmet-na idi mapasamak ti aksidente.
Maipalagip nga agpapa-amianan ti motorsiklo ket idi makadanon iti kurbada a paset ti kalsada ket saanna a nakontrol ti manibela ti luganna, puon ti pannakaidungparna iti pader ti maysa a pagtaengan.
Nadunor ti ulo ti drayber a naipan iti Ilocos Sur District Hospital, Bio, Tagudin para iti pannakatamingna ngem saanen a nakalasat.
