Agpada a nadunor dagiti nagmaneho ti electric bike ken motorsiklo gapu iti aksidente a nakairamananda iti provincial road idiay Barangay Darapidap, Candon City, Ilocos Sur.
Ti nagmaneho ti four wheeled Electric Bike ket maysa a babai nga agtawen iti duapulo ket innem, teller iti maysa a remittance center, awanan ti driver’s license nga agtaltalinaed ita idiay Barangay Talogtog, Candon City.
Ti met nagmaneho ti motorsiklo ket lalaki nga agtawen iti duapulo ket dua, estudyante, addaan ti Non-professional drivers license nga agnaed idiay Darapidap, Candon City.
Iti pannaki-uman ti Bombo Radyo Vigan ken ni PLt. Jovelyn Antalan, agpada a daldalyasaten dagiti dua a driver iti daya a direksyon idi nadanonda iti nasao a lugar ket nagsignal ti ebike iti left flasher ken nagsikko tapno sumrek iti barangay road idiay Barangay Talogtog idin ta nag-overtake ti motorsiklo kadagiti dua a traysikel iti sangona ket saanna a nakita ti ebike a nagsikko isu a nadungparna.
Gapu ti pasamak ket na-fracture ti ima ti driver ti ebike idinto a nagasgasan ti akin-kannigid a takyag ken akin-kannawan a tumeng ti driver ti motorsiklo isu nga agpadada a naipan iti St. Martin de Porres Hospital para iti pannakatamingda.
Iti agdama ket agtaltalinaed dagiti dua iti ospital para iti panagpaimbagda.
