Dead on arrival ti drayber ti 10-wheeler wing van truck a nagbaliktad idiay Sitio Kakaldingan, Barangay Lungog, Narvacan, Ilocos Sur.
Nabigbig ti drayber a ni Manuel De Guzman Gutierrez, agtawen iti tallopulo ket walo, taga-Tebag, Sta. Barbara, Pangasinan idinto a ti helper ket ni Rodrigo Sagrada Macapagat, agtawen iti duapulo, taga-Dolores, Abra.
Iti pannaki-uman ti Bombo Radyo Vigan ken ni PLT. Johnny Alibin, agsalog ti trak iti zigzag a paset ti Sitio Kakaldingan ta naggapu daytoy idiay Abra a mapan koma idiay Sta. Barbara, Pangasinan nga agideliver kadagiti bote idin ta naawanan iti kontrol ti drayber ket nagbaliktad iti igid ti kalsada ket naipit ti drayber.
Naitaray iti Ilocos Sur District Hospital-Narvacan ti drayber ken ti pahinantena a nadunor ngem saanen a nakalasat ti drayber.
Mapapati nga agdadamo pay laeng ti drayber iti panagmaneho kadagiti dakkel a lugan.
