Nadunor ti drayber ti motorsiklo gapu iti napasamak nga aksidente iti national highway ti Barangay Barbarit, Magsingal, Ilocos Sur.
Ti drayber iti motorsiklo ket maysa a lalaki nga agtawen iti duapulo ket maysa, minanehona ti Yamaha Mio i125, taga-Barangay Bacsil, San Juan.
Ti met Toyota Fortuner ket minaneho ti lalaki nga agtawen iti uppat a pulo ket maysa, taga-Barangay Maas-asin, Magsingal.
Iti pannaki-uman ti Bombo Radyo Vigan ken ni PLT. William Costales, nagsikko ti SUV ket idi nakaballasiw, isu met ti gundaway a nasagid ti napaspas ti tarayna a motorsiklo ti sango a paset ti nasao a four wheels sakbay a naidungpar iti Indian tree iti igid ti kalsada.
Naipaagas iti ospital ti drayber ti motorsiklo gapu iti dunor ti nadumaduma a paset ti bagina, idinto a saan met a naan-ano ti nagmaneho iti SUV.
