VIGAN CITY – Maysa ti nadangran a drayber iti aksidente a nakairaman ti dua a lugan idiay Barangay Bayubay Sur, San Vicente.
Ti Honda Brio ket minaneho ni Princess Neptalia Reynante Quebral, agtawen iti tallopulo ket walo, college instructor, taga-Barangay San Sebastian, San Vicente.
Ti met Mitsubishi Montero ket minaneho ni John Leo Belandres Ruelos, agtawen iti uppat a pulo ket dua, Hospital Administrator, taga-Barangay San Sebastain, San Vicente.
Iti pannaki-uman ti Bombo Radyo Vigan ken ni Police Captain Pedro Halover, nakaparking ti Honda Brio iti igid ti kalsada idi natukbob ti agpapalaud a Mitsubishi Montero.
Gapu ti kapigsa ti impact, naitim-og ti ulo ti drayber ti Honda Brio iti manibela isu a naipaagas iti ospital idinto a saan a naan-ano ti drayber ti Mitsubishi Montero.
Natakuatan a nakainom ti nagmaneho iti Mitsubishi idi mapasamak ti insidente.
Baklayen ti drayber ti Montero ti pagpaistimar iti nadadael a paset ti Honda Brio ta aminado met nga isu ti nakinbasul iti napasamak.
