Parikut ita kadagiti agindeg iti Namalpalan, Magsingal, Ilocos Sur ti panagraira dagiti adu a ngilaw iti arubayan ken uray iti uneg ti pagtaenganda.
Iti pannaki-uman ti Bombo Radyo Vigan iti maysa nga agindeg a ni alyas Cristina, nabayagen a kastoy ti sasaadenda tunggal madanon ti harvest season kadagiti poultry farm iti lugarda.
Apektado ti inaldaw a panagbiagda ta uray dagiti bilagda a bado ken waya a pagbilaganda ket pagumokan iti ngilaw.
Kunana nga uray pay no kallubanda dagiti isaganada a taraon ket addanto latta ngilaw a makastrek.
Dagiti met dadduma ket agusarda payen iti muskitero a mangan ken tunggal ipagnada ti taraon a kankanenda tapno mabugaw dagiti agdisso a ngilaw.
Umar-arungaing ni alyas Cristina kadagiti maseknan iti barangay a tignayanda daytoy a mapaspasaranda nga agindeg.
Kabayatanna, impasigurado ni Barangay Captain Richard Battad a manarimaanen ti negosasyon mainaig iti nasao a banag ket kiniddawna ti panaguray dagiti agindeg ta impanamnamana a maipakaammonto a dagus kadakuada no ania ti agbalin a pangngeddeng.
Segun ken ni Battad, addan dagiti dadduma a poultry farm iti nasao a barangay ken iti kabangibangna ti saanen a napalubosan a mangituloy iti operasionda.
Malaksid dayta, inlawlawag ti opisial nga awan ti nairekord a nagsakit gapu iti nasao a banag.
