Impaganetget ni Department of Public Works and Highways (DPWH) Secretary Vince Dizon ti bilin ni Pres. Ferdinand Marcos Jr. nga ikkaten ken pasungbaten amin a karaman iti korapsyon iti pagilian iti baet ti nakaro a kilos-protesta idiay Edsa Shrine ken Luneta Park.
Nagtaud dagti protesta iti isyu iti maanomalya a substandard flood control projects a mapapati a nakainaigan ti sumagmamano a korap a DPWH officials, dagiti kontraktor ken mismo nga agpampanday linteg.
Segun ken ni Dizon, saan nga agsardeng iti ahensya agingga saan a matungpal ti bilin ti presidente kontra ti korapsyon mainaig kadagiti flood control project.
Insigida a nagtignay ti DPWH kasaruno ti bilin ti presidente ket nagipiladan iti tallo a kaso iti Ombudsman a gapuanan iti pannakakaso iti duapulo ket innem a tattao, tallo nga opisyal iti na-dismiss idinto a sangapulo ket pito iti nasuspenso ken nakaituding a mayakar iti serbisio kadagiti sumarsaruno nga aldaw.
Idi laeng kallabes indatag ni President Marcos ti Independent Commission for Infrastructure tapno imbestigaran a nalaing dagiti anomalya iti flood control ken dadduma pay nga infrastructure projects tapno labanan iti korapsyon.
