Kinumpirmaran ni Department of Public Works and Highways Secretary Vince Dizon nga adu ti madi a coordinates dagiti flood control project a nai-report iti Sumbong sa Pangulo website idi napan a tawen.
Segun ken ni Dizon, napagpatanganda dayta ken ni Senate President Pro Tempore Panfilo Lacson nga immuna a nangibutaktak iti isyu.
Kinuna ni Dizon a pudno nga adu ti proyekto nga adda madi a coordinates-na a posible a gapu iti panagkamali wenno posible a naigagara.
Imbingay pay ti DPWH chief nga uray isuda ket naallilaw idi personal nga ininspeksyonda dagiti lugar.
Maipalagip nga inrusat ni Pres. Ferdinand Marcos Jr. ti Sumbong sa Pangulo website a maysa a direkta a linya para kadagiti Pilipino tapno agreport kadagiti parikot iti flood control projects.
