Aminado ni Department of Public Works and Highways Secretary Manuel Bonoan nga adda dagiti ghost project kadagiti sumagmamano a distrito idiay Bulacan.
Iti imbestigasion ti Senate Blue Ribbon Committee, sinaludsod ni Senate President Pro Tempore Jinggoy Estrada ni Bonoan no adda kinaagpaysona dagiti damag ket simmungbat met ti opisial nga ita laeng a naamoanna ti anomalya ken madama nga iberberipikana.
Imbutaktak pay ni Estrada nga adda dagiti ghost project idiay Calumpit, Malolos, ken Hagonoy, Bulacan.
Dagiti kontratista kadagitoy a proyekto ket ti Wawao Builders Corporation nga adda pakabuklan a badyetna a P5.9 bilion idiay Bulacan sipud 2022 agingga 2025.
Maysa ti Wawao Builders a kontraktor dagiti “ghost” flood control projects idiay Bulacan kadagiti 15 a contractor a dinakamat ni Presidente Ferdinand Marcos Jr. a nakaala ti kaaduan kadagiti flood control projects ti gobierno.
Saan pay a simmungbat ti kompania nga idadaulwan ni Mark Allan Villamor Arevalo iti awis ti Senado a dumar-ay iti imbestigasyon.
Kabayatanna, kinuna met ni Senador Erwin Tulfo a saan a nainkalintegan nga agikkat iti puesto ni DPWH Secretary Manuel Bonoan iti baet ti kontrobersya ken imbestigasyon iti naanomalya a flood control projects.
Segun ken ni Tulfo, awan parikut iti opisial no di ket nagtaud dagitoy kadagiti opisial iti salinong ti panangidaulona kas kadagiti undersecretary, regional directors, district engineers, ken contractors.
