Nagpanawagan ni Senate Labor Committee Chair Joel Villanueva iti Department of Labor and Employment (DOLE) a mangilatang iti temporario a programa para iti minimum wage earners bayat a nakapenpen iti korte ti pannakaipatungpal ti P85 wage hike idiay Metro Manila.
Segun ken ni Villanueva, saan a rumbeng a marigatan dagiti mangmangged bayat a malawlawagan dagiti legal a patangan maipanggep ti wage order kangrunaan iti agtultuloy a panagpangina ti presyo iti taraon ken krudo.
Impaganetget ti senador a kasapulan dagiti mangmangged iti nayon a sueldo ta saan nga umdas iti agdama a minimum wage para iti disente a panagbiag.
Kagiddan dayta ket pinasingkedan ni Villanueva ti suportar iti National Wages and Productivity Commission (NWPC) ken Regional Tripartite Wages and Productivity Board – NCR iti panagkiddawda iti mayannatup a remedyo iti Office of the Solicitor General.
Impaganetgetna a rumbeng a maipangruna ti tripartite wage-setting mecganism a naaramid iti salinong ti Republic Act No. 6727, imbes nga agpaut iti proseso iti korte ti patangan iti panangituding iti sueldo.
Kinuna ni Villanueva a ti wage hike ket rumbeng a pagpatangan iti nagbaetan dagiti mangmangged, management ken gobierno kas maibasar iti actual a pagkasapulan, ken saan a rumbeng a mariribok gapu iti trial.
