Namakdaar ni Justice Undersecretary Nicky Ty iti posible a panagsubli dagiti small scam hubs ditoy Pilipinas kalpasan ti agsasaruno nga operasion dagiti otoridad kontra kadagiti iligal a pasilidad.
Nasurok a 230 a trabahador ti inispal dagiti otoridad manipud iti scam hub sadiay Zamboanga Sibugay idi rugrugi ti Oktubre, ken segun ken ni Ty, kaaduan kadagiti ganggannaet a naispal kadagiti kallabes nga operasion ket Chinese nationals.
Impalgak ni Ty a dadduma kadagiti Intsik a nasarakan kadagiti scam hub ti simrek iti pagilian babaen ti panangusar iti urnos nga awanan iti visa ken dadduma ti nalabes ti panagyanda, iti kasta posible a gundawayanda ti pribilehio.
Agtultuloy ti panagurnong ti Department of Justice (DOJ) ken ti Inter-Agency Council Against Trafficking (IACAT) iti impormasion a mangbukel kadagiti rekomendasion maipapan iti visa-free arrangement, bayat nga agtalinaed ti Pilipinas iti Tier 1 ranking ti 2026 US Trafficking in Persons Report.
