Pinabileg ti Department of Health ti kampanyada kontra iti panagaramat iti vape kadagiti pagadalan ken impaganetgetda ti kinapateg ti vape-free environment para kadagiti estudiante kagiddan ti selebrasyon ti No Smoking Month.
Segun ken ni DOH Assistant Secretary Gloria Balboa, napateg ti adbokasiya ti ahensia kadagiti pagadalan ta adu nga estudiante ti agus-usar pay laeng iti vape ken sigarilyo.
Maibasar iti 2019 Global Youth Tobacco Survey ti World Health Organization, 809,677 wenno 12.7 porsiento kadagiti agtutubo ti agar-aramat ti tobacco products idinto a 913,316 wenn 14.1 porsiento kadakuada ti agar-aramat ti vape wennu e-cigarettes.
Nagballaag ti DOH a ti panagaramat iti vape ket mabalin nga agresulta iti e-cigarette wenno vapor product-associated lung injury (EVALI), nicotine addiction, ken respiratory ken cardiovascular diseases.
