Pinainget ti Department of Energy ti panagbantayda iti presio ti produkto-petrolyo kalpasan a naammuanna nga adda sumagmamano a paggasolinaan ti nasapa a nagpangina iti nasurok-kumurang P8 kada litro sakbay pay ti naituding nga schedule.
Segun iti DOE, makibimbinnuligdan kadagiti law enforcement agencies, agraman ti Philippine National Police, tapno mapapigsa ti monitoring ken inspeksion kadagiti retail fuel station iti intero a pagilian.
Nangrugin a naginspeksion ti DOE iti nadumaduma a paggasolinaan tapno masigurado a sumursurotda iti husto a presio ken regulasion.
Inallukoy ti ahensia ti publiko nga agridam ken dagus nga ipakaammo ti makapaatap a tignay kas ti hoarding wenno panagidulin iti suplay, manipulasion iti presio ken dadduma pay nga iregularidad kadagiti paggasolinaan.
