Padpadarasen ti Department of Energy (DOE) ti pannakaipatungpal ti 22 renewable energy projects kas solusyon ti pangta iti krisis iti langis ken tapno mapapigsa ti alternatibo a pagalaan iti kuryente.
Segun ken ni Usec. Claire Castro iti Presidential Communications Office, gagem ti gobierno a makissayan ti panagdepende iti pagilian iti imported a langis a masansan a maapektaran iti panagpangato iti presyo iti world market.
Pinasingkedan ni Castro a karaman kadagiti napadaras iti proyekto ti DOE ti sangapulo ket dua a solar, innem a hydroelectric, dua a biomass, maysa a wind projects ken maysa nga integrated renewable energy storage system.
Impaganetgetna a napateg dagiti proyekto kangrunaan iti panawen ti oil crisis, nga agbaliw-baliw ti presyo iti produkto petrolyo a mabalin a makaapektar iti suplay iti kuryente ken magastos dagiti consumer.
Babaen ti panangyatiddog ti renewable energy, namnamaen ti gobierno a maaddaan ti natibtibker, nalaklaka ken nadaldalusen a suplay iti enerhia iti pagilian.
