Binigbig ti Department of Energy (DOE) dagiti sumagmamano a lugar iti pagilian a posible a pakaipatakderan dagiti nuclear power plant iti masangwanan.
Iti panagdengeg ti Senate Committee on Science and Technology, kinuna ni DOE Director IV Patrick Aquino a karaman iti mayannatup a lugar a pakaipatakderan iti sumagmamano a paset iti Bataan, karaman iti agdama a lokasyon ti Bataan Nuclear Power Plant kasta pay idiay Labrador, Pangasinan, dagiti lugar idiay Camarines Norte, Puerto Princesa idiay Palawan ken Masbate.
Napili dagitoy iti naisayangkat a pisikal nga inspeksyon ken panag-imbestigar iti gobierno.
Segun iti DOE, target ti Pilipinas a maaddaan ti commercially operational nuclear power plants inton 2032, nga iti umun-una ket addaan ti 1,200 megawatts, ken mayatiddog iti agingga 4,800 megawatts inton 2050.
Kabayatanna, naidatag pay iti sumagmamano a rumbeng a maikonsiderar iti pannakaipatakder iti Nuclear power plant.
Pinasingkedan ti DOST-Philippine Nuclear Research Institute a ti kapaspasan a wagas tapno makastrek iti pagilian iti nuclear energy ket iti pannakapataray manen ti Bataan nuclear power plant ngem agtaltalinaed a saan a maus-usar gapu kadagiti isyu ti pulitikal.
