VIGAN CITY– Saan nga umanay ti pension nga aw-awaten dagiti senior citizen a lima gasut a pisos binulan, dayta iti inpaganetget ni Bayan Muna Partylist Rep. Carlos Isagani Zarate.
Segun kenkuana, ngimmato ti presyo dagiti kangrunaan a produkto ken serbisyo nangruna ket naipatungpal ti TRAIN law wenno iti baro a tax reform program ti duterte administration.
Gapu iti dayta, kalikaguman ti partido a maipasa ti “Expanded Senior Citizen Social Pension Act” , kabayatan ti 17th congress.
Ingunamgunam ni Zarate a nabayagen nga iyur-uray dagiti senior citizen a mapagbalin a linteg ti gakat tapno mapagbalin a sangaribo a pisos ti pension da binulan manipud iti agdama a lima gasut a pisos.
Ad-ado pay ti sakupen ti gakat agsipud ta amin a senior citizen nga awan ti pension na ken dagiti agpenspension ti saan a nangatngato ngem tallo ribo lima gasut a pisos binulan ket umawat payen iti nasao a pension.
