Impasigurado ti Department of Migrant Workers wenno DMW a tulonganda dagiti Pilipino nga apektado iti rinnupak idiay Middle East a kayatna nga agawid iti pagilian.
Kasaruno dayta iti naawat ti embahada iti Pilipinas idiay Israel a limapulo ket uppat a request for repatriation wenno kiddaw nga agbakwit kalpasan ti pammomba iti Amerika ken Israel idiay Iran.
Segun ken ni Felicitas Bay a DMW Undersecretary for Foreign Employment and Welfare Services, agtultuloy iti pannakikammayetda iti Department of Foreign Affairs ken Overseas Workers Welfare Administration (OWWA) para iti maisayangkat a repatriation.
Aminado a narigat iti sitwasyon iti Middle East para kadagiti Pilipino nangruna ket umabot iti dua a million ti agtrabtrabaho iti Middle East countries.
Balakadna kadagiti Pilipino a naapektaran iti riribok a sumurot kadagiti regulasyon kadagiti pagilian nga ayanda tapno maliklikan iti riribok.
