Kinumpirmaran ni Department of Migrant Workers (DMW) Secretary Hans Leo Cacdac a duapulo ket lima nga overseas Filipino workers (OFW) ti agdama nga adda ti death row iti agduduma a pagilian.
Segun ken ni Cacdac, bimmaba iti bilang dagiti OFW iti death row kangrunaan idiay Malaysia kalpasan nga impatungpal ti nasao a pagilian iti nalawlawa a polisia maipanggep ti commutation ti sentensya.
Inlawlawagna nga agtultuloy iti behind-the-scenes negotiations wenno kadagiti limed a negosasion a tulong ti Department of Foreign Affairs (DFA), Office of the President, ken dadduma pay a maseknan nga ahensia tapno maliklikan iti panangbitay ken masukatan iti nalaglag-an a pannusa kadagiti sentensya dagiti Pilipino nga adda iti death row.
Pakaragsakan met ni Senate Committee on Finance Chairman Win Gatchalian ti tignay ti DMW tapno matulongan dagiti distressed OFWs kangrunaan idiay Middle East.
Iti panagbisitana kadagiti Embahada iti rehiyon, manipod limagasut agingga innem a gasut a distressed OFW a dati nga adda iti halfway houses idiay Dubai, Saudi Arabia ken dadduma pay a paset idiay Middle East ket bimmaban iti duapulo agingga limapulo.
