Imbilin ti Philippine National Police (PNP) ti pannaka-adal ken panangsimpa ti disability discharge policies dagiti otoridad.
Segun ken ni PNP Acting Chief PLt. Gen. Jose Melencio Nartatez Jr., paset dayta iti maisaysayangkat nga internal reforms iti organisasyon tapno masigurado a dagiti law enforcer a nagsagaba ket makaawat iti husto a pammigbig, benepisyo ken gundaway a maituloy iti panagserbida no kabaelanda pay laeng.
Dayta ket kasaruno iti sarita ni President Ferdinand Marcos Jr. maipanggep ti viral video ti maysa nga Army captain a nabulsek kalpasan a napabettakan.
Imbilin ti presidente iti Department of National Defense ken Armed Forces of the Philippines a simpaen ken papigsaen ti disability discharge rules-da kalpasan ti forced retirement iti nasao a suldado.
Binilin pay ni Nartatez ti PNP Health Service ken ti Directorate for Personnel and Records Management a mangisayangkat ti audit iti agdama a proseso ti disability discharge kangrunaan kadagiti daan a probisyon, pagkurangan ken dadduma pay.
