Pinasingkedan ti Department of the Interior and Local Government (DILG) a saan a lehitimo ti naranggas a protesta idiay Mendiola idi Domingo, September 21, 2025 no di ket mapapati a nabayadan ken organisado a panangraut tapno ririboken ti gobierno.
Segun ken ni DILG Secretary Jonvic Remulla, naala dagiti menor de edad nga agtawen iti sangapulo ket maysa manipud Quiapo ken nabayadanda iti sag-Php3,000.00 tapno makipasetda gapu ta adda mapapati a nagwaras iti social media nga ipapasindayag dagiti sumagmamano iti naawatda a kuarta.
Kinuna ni Sec. Remulla a nabilin dagiti grupo a danonen iti Malacañang ken no mabalin ket uramenda iti pasdek.
Maipanggep iti isyu, agarup 217 nga indibidual ti maimimbestigaran, pakairamanan ti siam a pulo ket lima a menor de edad idinto a taktakuaten pay laeng dagiti pannakabagi ti linteg siasino ti adda iti likodan iti riribuk.
Segun iti ahensya, mabalin a sumango dagiti nairaman iti kaso nga arson, destruction of property, inciting to sedition, ken sedition.
Impasigurado ni Remulla nga agtalinaed ti administrasyon ni President Ferdinand Marcos Jr. kadagiti prinsipio ti due process ken maintaining order. Augie Arellano
