VIGAN CITY – Nagballaag ni Department of the Interior and Local Government Usec. Martin Diño a makasoan dagiti opisial iti tunggal local government unit no saanda a maipatungpal a nasayaat dagiti pagannurotan nga inyetnag ti national government kabayatan iti pannakaipatungpal ti enhanced community quarantine gapu ti COVID19.
Dayta ket kalpasan nga adda dagiti naawatda a reklamo nga adda dagiti agsusugal, agtatadi ken ti parikut ti pannakaiwaras ti tulong babaen iti social amelioration program kadagiti agindeg iti tunggal barangay.
Iti pannaki-uman ti Bombo Radyo Vigan kenni Diño, inlawlawagna a saan nga iti kapitan ti barangay ti akin-iggem ti kuarta a maited kadagiti agindeg a naapektaran iti lockdown no di ket ti tunggal opisina ti Department of Social Welfare and Development iti tunggal ili ta isuda ti mangvalidate no siasino dagiti rumbeng a makaawat ti tulong iti salinong ti nasao a programa.
Pannakaibalud iti dua a bulan wenno mamuelta iti sangapulo a ribo a pisos agingga maysa a milyon a pisos wenno ti pannaikkatda iti pwesto ti dusa a sangwenda no saanda a makasurot kadagiti paglintegan nga adda iti salinong ti Bayanihan to Heal as One Act idinto a dagiti met dagiti makasurot iti pagannurotan ket mapadayawan babaen iti Seal of Good Governance.
