Rinibo nga agpammati iti nakipaset iti Diamond Jubilee of the Canonical Elevation of the Diocese of Nueva Segovia into an Archdiocese a naisayangkat iti Metropolitan Cathedral and Parish of the Conversion of St. Paul iti Vigan City, Ilocos Sur.
Ti nasao a panagrambak ket babaen ti panangidaulo ni Arch. David William Antonio nga Archbishop iti Nueva Segovia; ken panangibingay ti homily ni Cardinal Orlando Beltran Quevedo iti Archdiocese iti Cotabato.
Nakipaset pay ni Most Rev. Charles John Brown nga Apostolic Nuncio to the Philippines ken His Eminence Jose Advincula iti Archbishop of Manila ken dagiti Obispo ken papadi manipod iti agduduma a diocese.
Iti nagbalin a mensahe ni Most. Rev. Charles Brown, impaganetgetna ti pateg ti panagrambak gapu iti agtultuloy a “growth” ken “expansion” iti pammati iti katoliko iti Northern Luzon gapu iti panagbalin nga archdiocese iti Nueva Segovia.
Segun ken ni Brown, rumbeng a pagyamanan ti Dios iti panagraira iti pammati iti intero a northern Luzon iti uneg iti pitopulo ket lima a tawen agingga ita a gundaway.
Pinasingkedan met ni His Eminence Jose Advincula iti Archbishop of Manila a ti kaaddana para iti selebrasyon ket gapu ta ibilangda nga anak ti Archdiocese of Manila iti Nueva Segovia kadua ti Cebu ken Naga a naaramid iti 1591, ken ti maikadua a rason a dimmar-ay ket gapu ta ibilangna ti Vigan wenno Nueva Segovia kas maikadua a pagtaenganna ta nagbalin a formator idi 1990-1993 iti Immaculate Conception School of Theology.
Kinuna met ni His Excellency Marlo Peralta a saan laeng a palagip iti nabaknang a pakasaritaan ti panagrambak ta isu pay iti panangpabaro iti agtultuloy a panagkakadua para iti pammati, namnama ken ayat.
Impaganetgetna iti panagyaman iti napalaus a bendisyon ken panagkiddaw iti agtultuloy a pannarabay iti Namarsua para iti panangiyetnag iti ayat ken asi iti pada.
Nagyaman ni Msgr. Lovell Soller a Vicar General iti Archdiocese of Nueva Segovia kadagiti amin a dimmar-ay iti panagrambak ken dagiti timmulong para iti balligi a panakaisayangkat iti historic occassion ta instrument ti inaramidda para iti natibtiber a panagpammati.
Kabayatanna, bayat ti selebrasyon ket sinigurado dagiti otoridad iti nainget a panagbantayda iti seguridad dagiti amin a dimmar-ay.
Iti pannaki-uman ti Bombo Radyo Vigan ken ni Rhon Arquelada a Provincial Disaster Risk Reduction and Management Officer, manipod idi July 21 ket in-activate-dan iti Incident Management Team-da tapno masigurado iti kinatalged iti seguridad iti simbaan ken aglawlawna, kasta payen ti panangkita iti traffic ken crowd management.
Segun ken ni Arquelada, mapatta-patta nga umabot iti dua ribo agingga tallo ribo nga agpammati iti nakipaset iti diamond jubilee.
No pay kasta ket awan met iti napasamak nga insidente bayat ti panagrambak.
