Idurduron ti Department of Human Settlements and Urban Development (DHSUD) ti maysa a napateg nga addang tapno masukatan ken aramiden a moderno dagiti pagannurotan ken regulasion nga adda kainaiganna iti pannakaipakat ti muelta kadagiti real estate companies ken practitioners nga aglablabsing.
Ti kangrunaan a gandat ti DHSUD ket iti panag-update ti muelta tapno mapapigsa ti proteksion kadagiti aggatgatang ti balay, daga ken tapno masuportaran dagiti developers a sumursurot ti linteg.
Segun ken ni DHSUD Secretary Jose Ramon Aliling, ti addang ket kasaruno ti direktiba ni Presidente Ferdinand R. Marcos Jr. a kayatna iti nalawag ken saan a matawaran a panagserbi kadagiti umili nga adda iti integridad, kinapardas ken pannakibiang.
Iti agdama, araramiden ti DHSUD iti panagsukisok iti Implementing Rules and Regulations (IRR), Guidelines, Administrative Fines ken Penalties a nakaipalaon iti Presidential Decree 957 of 1976, BP220, ken Republic Act 7279. – Reynand Fontejon
