Manarimaan iti panang-monitor ti Department of Foreign Affairs (DFA) babaen ti Philippine Consulate General idiay Los Angles ti kaso ni Mark Lorenzo Villanueva.
Ni Villanueva ket Pinoy US green card holder a nakemmeg gapu iti mapapati a panagpatulodna iti kuarta iti Islamic State of Iraq and Syria (ISIS) a maysa a designated foreign terrorist organization.
Ti inaramid ni Villanueva ket maibilang a felony offense nga adda dusa iti agingga duapulo a tawen a pannakaibalud.
Segun ti DFA, nakasaganada a mangipaay iti mayannatup a consular ken legal assistance para ti nasao a Pilipino.
Immunan a kinuna dagiti otoridad a nagipatulod ni Villanueva iti sangapulo ket dua a payments nga aggatad ti $1,615 iti uneg iti lima a bulan.
Maipalagip a naalaan pay isuna iti mapapati a bomba idi nakemmeg.
