Pok-pokusan ti Department of Foreign Affairs (DFA) ti maipagarup a recruitment kadagiti Pilipino tapno maki-giyera iti agtultuloy a tension ti nagbaetan ti Russia ken Ukraine.
Daytoy ti sungbat ni DFA Secretary Ma. Theresa Lazaro iti saludsod ni Senator Erwin Tulfo no kasano nga imon-monitor ti ahensia dagiti Pilipino a maalallukoy tapno makilaban iti giyera ti dua a pagilian.
Segun iti ahensia, dakkel a karit ti panang-monitor ti nadakamat a recruitment gapu ta kadawyan daytoy a maisaysayangkat kadagiti third country, kas ti United Arab Emirates, no sadino adu dagiti Pilipino a mangmangged.
Gapu daytoy, nangirruar ti ahensia idi Pebrero 11 ti advisory a nainget a nagbalaag kadagiti Pilipino kontra iti panagawat ti overseas employment offers a mabalin nga adda pakainaiganna iti recruitment para iti giyera.
