Pinalagipan ti Department of Education (DepEd) dagiti empleado-da a saan nga isuko wenno aramaten ti ATM payroll card-da kas collateral iti utang.
Iti DepEd Memorandum No. 049, series of 2026 a napetsaan idi August 12, impaganetget ti ahensia ti pannakaiparit ti panagaramat ti ATM payroll card kas loan collateral wenno panangisuko iti agpapautang.
Nadakamat iti memorandum ti immunan a memorandum a napetsaan idi April 18, 2020 ken ti pakaammo ti Bangko Sentral ng Pilipinas maipaggep iti “Sangla-ATM” scheme idi May 2023.
Segun ti DepEd, posible nga agresulta iti kasta nga aramid iti saan a kontrolado a panag-withdraw iti account, financial exploitation, nakaru nga utang ken posible a madi a panagaramat ti personal ken sensitibo nga impormasyon.
Naallukoy pay dagiti personnel nga agannad iti panagala ti loan ken liklikan dagiti informal ken saan nga otorisado nga agpapautang a mangididiaya iti nangato nga interes ken nadadagsen a kondisyon.
Nabalakadanda nga umutang laengan kadagiti accredited, authorized ken regulated lending facilities, pakairamanan ti Government Service Insurance System (GSIS), DepEd Provident Fund, Land Bank of the Philippines, ken Pag-IBIG Fund.
