Kagiddan ti panangrambak iti National Teachers’ Month, nangiruar ti Department of Education iti baro a pagannurotan a mangted iti overtime pay kadagiti public school teacher.
Maibasar iti pagannurotan, makaawat iti 125 percent iti hourly rate dagiti mangisursuro para iti overtime iti weekdays ken 150 percent met iti weekends ken holidays.
No agkurang ti pondo, mabalin nga isukat ti bayad iti Vacation Service Credits, basar iti pagallagadan ti DepEd.
Kasapulan nga adda minimum a dua nga oras nga overtime sakbay nga agbalin a kwalipikado para iti bayad; no nabab-baba ngem daytoy, mai-credit kas VSC.
Maipalubos ti agingga uppat nga oras ti overtime kada aldaw, ken kakaisuna a dagiti mangisursuro nga adda 30 a classroom kada lawas ti saklaw ti benepisyo.
