Inkalintegan ti Department of Education ti planona a mangipatungpal iti three-term school calendar mangrugi iti School Year 2026-2027, iti baet ti kumarkaro a pannakababalaw manipud kadagiti grupo dagiti mangisursuro.
Segun iti DepEd, gagem ti reporma a masigurado ti agtultuloy a pannakasursuro ken maksayan ti pannakataktak ti klase.
Kinunada nga iti School Year 2023-2024, immabot iti 53 manipud iti 180 nga aldaw ti serrek ti naawan gapu iti saan a nasayaat a paniempo ken non-instructional activities, a nagresulta iti compressed lessions ken naksayan nga oras ti panagadal.
Iti salinong ti baro a sistema, magudwa ti school year kadagiti structural term nga adda opening period-na para kadagiti assessment ken panagsagana, naat-atiddug nga agtultuloy nga instructional phases, ken end-of-term period para iti remediation, enrichment, ken teacher development.
Gagem ti ahensia ti panagbalbaliw a maaddaan iti naur-urnos ken predictable nga annayas ti panagisuro, idinto a maikkan ti panawen dagiti administrative task ken wellness activities tapno maksayan ti teacher burnout.
