Indatagen ti Department of Education dagiti addang ken plano tapno masigurado a saanen a maulit ti napasamak a pammaltog iti uneg ti San Jose National High School idiay Tacloban City ken dagiti dadduma pay a krimen iti sabali a pagadalan iti pagilian.
Dayta ti pinasingkedan ni DepEd Assistant Secretary for Governance and Operations Rogel Masapol iti panagdengngeg ti House Committee on Basic Education and Culture nga idadaulwan ni Rep. Roman Romulo.
Segun ken ni Masapol, kalpasan ti shooting incident idiay Tacloban ket dagus nga imbilin ni DepEd Secretary Sonny Angara ti panangisayangkat iti school safety and security audit tapno maammuan no mano kadagiti pagadalan iti pagilian ti adda wenno awan ti security guard-na, dagiti adda alad ken metal detector-na.
Pinapigsa pay ti DepEd ti koordinasionda iti Philippine National Police.
