Nagpanawagan ti Department of Environment and Natural Resources (DENR) iti publiko nga agtiped iti panagaramat ti danum gapu iti posibilidad a panagsubli ti El Niño.
Segun iti DENR, gagem ti addang a masigurado ti naan-anay ti suplay ti danum para iti inumen, kadagiti health facility, ken dadduma pay a napapateg a serbisio.
Maallukoy ti publiko a pabassiten ti oras iti panag-digus, iserra dagiti gripo no saan nga us-usaren, dagus a simpaen dagiti leak, ken dadduma pay.
Balaag ti DENR a liklikan ti saan a kasapulan a panagaramat ti danum kas panangdalus ti lugan, panagsibog babaen ti hose ken panangpunno kadagiti pribado a swimming pool.
Mangiruar pay ti regular a report ti ahensia mainaig iti lebel ti danum kadagiti reservoir ken dagiti addang iti panangrisut, kabayatan a maikkan ti priyoridad dagiti ospital, clinic ken marigrigat a komunidad no kas bilang maaddaan ti kinakurang ti suplay ti danum.
