Maysa a delegado iti Region 1 Athletic Association Meet (R1AA) iti siudad ti Candon ti natakawan iti cellphone.
Ti biktima ket delegado manipud La Union idinto a ti suspek ket katalekda met laeng nga isu ti agideldeliver kadagiti mainom.
Iti pannaki-uman ti Bombo Radyo Vigan ken ni PLT. Jovelyn Antalan, adda dagiti atleta iti billeting area-da kadua dagiti coach ken dagiti mangisursuro idin ta nagideliver ti suspek kadagiti mainom.
Makita iti CCTV footage a bayat ti panagideliver ti suspek ket agpalpaliiw no adda nakakita kenkuana a tao iti uneg.
Kalpasan ti sumagmamano a gundaway, dimteng met ti maysa pay a kaduana a nagideliver a nangted iti resibo ket indisso met ti suspek daytoy iti lamisaan nga ayan ti naka-charge a cellphone.
Idi pinidot ti suspek ti resibo, inramanna met nga innala ti cellphone sa napanen iti luganda.
Apagsubli dagiti delegado iti billeting area ket nadlawda a mapukpukaw ti cellphone isu a nagpatulongda kadagiti pannakabagi ti linteg ket idi kitaenda ti CCTV, naduktalan a ti nagdeliver ti mainom ti nangala iti cellphone.
Tinawaganda ti suspek a pinagsubli iti billeting area ket inaminna nga innalana ti cellphone ngem kunana nga insublina met laeng, ngem saan daytoy a makita iti CCTV.
Nupay kasta, nakemmeg ti suspek ket sangwenna ti kaso a theft.
