Impeksa ti Defend Ilocos Sur ti pakaseknanda iti agtultuloy a dredging operation iti ili ti Sta. Cruz.
Iti pannaki-uman ti Bombo Radyo Vigan ken ni Clio Rojas, nangrugin ti operasion sakbay pay a naisayangkat ti public consultation, isu a kwestionarenda no adda met laeng kaes-eskanna ti proseso ti konsultasion.
Impaganetget ti Defend Ilocos Sur a no pudno a flood control ti gagem ti proyekto, nasken a naibasar iti siyentipiko a panagadal, sumursurot iti paglintegan ken environmental safeguards, ken nalawag nga adda pammalubos dagiti apektado a lugar.
Nagballaagda pay iti posible nga epekto ti mass dredging iti aglawlaw, kabaybayan, ken pagbiagan dagiti mangngalap.
Agtultuloy ti panawagan ti grupo nga isardeng ti makadadael a dredging ken extractive mining, siguradwen nga adda pudno a pampubliko a konsultasyon, transparency, accountability, nainkalintegan a kompensasion kadagiti maapektaran ken pannakaipatungpal ti komprehensibo a rehabilitation ken independent monitoring ti proyekto.
