VIGAN CITY – Saan a namnamaen ni Jim Jerico Cedric Uy a taga Piat, Cagayan nga isuna ti Rank 2 iti kalkalpas a Philippine Nurses Licensure Examination.
Iti pannakiuman ti Bombo Radyo Vigan kenkuana, saan isuna a kampante iti panagexamna ngem patienna a bunga amin dayta dagiti rigat ken dedikasyonna bayat iti panagreview kagiddan ti natibker a pammatina iti namarsua.
Kunana a tapno makapagpokus ket adda iti sursurotenna a routine, ken no tunggal agreview ket agdeactivate iti social media .
Balakadna met kadagiti saan a nakapasa ken kadagiti agexam nga agtalinaed a manamati ken aramiden amin a kabaelanda agingga a mapagballagianda ti exam.
Segun kenni Uy, iti ununa ket saanna ammo ti alaenna a kurso ngem nagkiddaw isuna ti pannarabay kenni Mama Mary a nangiturong ti panagala na ti kurso a nursing.
